MARTARTE NI

  Kristianna hian a din tirh atangin pawnlam leh chhunglam hmelma do tur a hmachhawn a. Lal Isua thih hnu atang phei chuan pawnlam atanga beihna hi a na hle a. Lal Isua zirtir sawmpahnihte khan huaisen takin dodalna karah pawh Pathian ram thu an hril zel a; Hmangaih Johana tih loh chu martarin an thi vek a nih kha. Rom sorkar hnuaia ringtu hmasate tihduhdahna chu vawiin thleng hian kan la sawi bang thei lo va. Ringtute’n an inhum nana an bihrukna puk sei tak mai ‘Catacomb’ chuan chanchin pawh a ngah viau reng a ni.

Lal Isua zuitute chuan a thuchah hnuhnung angin ram hrang hrangah an vak darh ta a. An thu hriat chu rinawm takin a tawp thlengin an hril zel a. Chung rinawm taka thih thlenga Lal Isua thuhretute chu ‘Martar’ kan tihte chu a ni. Vawiin thleng hian lu chhum ban chhum pawh huama thuhretu hna hnawktu hi an la awm zel a. Khawvel huapa missionary ropui tak tak martara thi ta tam tak an awm. Kan ramah ngei pawh Vanlalliana leh Rohminglianite bakah midang martara thi sawi tur an awm awm e. Heng kan rama missionary martar ta te hi ramdang missionary ropui tak tak martara thi ta te ang bawka ngaihsantlak an ni tak meuh a ni.Martar tih tawngkam kan hman dan erawh chu kan fimkhur deuh a tha hle. Lalnu Ropuiliani pawh kha martar kan ti mai thin a. A dikna chen awm mah se Kristianna eng atanga teh erawh chuan martar han tih tur erawhchu a ni lovang chu. Chuvangin martar kan tih chuan a kawh ber chu Lal Isua thuhretu nih avanga nunna chan tate hi a ni. Lalpa ram tulna avanga thildang ngaihtuah hman lova Pathian ram zauna tur atana mi inpe tak tak nunna hial hlan ta kan ramah hian an awm ve ta nual a. Heng mite hi chanchin tha hril darh zel nana rinawm taka a fawng lo vuantute an ni.Heng martarte hriatrengna ni hi an puala hman ve a tha lawm ni tih chu Hnahthial ABC atangin Assembly-ah ngaihtuah turin a rawn lut a. Kum 2002 Assembly chuan ngun taka a ngaihtuah hnuin thil tihawm takah a ngai a; a bawhzui turin Administrative Committee a ruat a. Administrative Committee chuan March thla Pathianni hnuhnung ber chu Martarte Ni atan a lo ruat nghet ta a ni. Hemi ni hian Headquarters atanga thupui thlan inang tlang hmangin Baptist Kohhran Biak in tinah hun hman a ni thin. Tun thlaah chuan Martarte ni hi Tumkau Pathianni nen a hun inruala a tlak avangin he ni hi lang lo zawka a lo tang ta a nih pawhin rinawm taka Pathian ram tana thawktute hi hriat reng kan mawh tak zet a ni. Missionary rilru pawh hian tlakhniam lam hi a pan a hlauhawm avangin heng kan mi huai kal hmasate hi entawna hmangin kan infuih thar zel hi a tul tak meuh ni.