BIBLE COMMENTARY
Jona chu ni thum leh zan thum nghapui kawchhunga a awm ang khan, Mihring Fapa hi ni thum leh zan thum lei kawchhungah a awm bawk dawn a ni (Matt 12: 40).
A chunga kan Bible chang tarlan khi Lal Isua thusawi a ni a. Amaherawh Lal Isua hi ni thum leh zan thum chiah phum a ni reng em tih erawh chu chhut dik thiam a har hle a ni. Zirtawp ni tlaia phum a niha Sunday zinga a thawhleh si chuan ni hnih leh zan hnih chiah lei kaw chhungah a awm tihna a ni ang. Darkar 72 thlana a awm leh si loh chuan a thusawi nen a inkalh tihna a ni.
He lai Bible chang hi mi thiam thenkhat chuan Lal Isua sawi ni lovin Chanchin tha ziaktu Matthaia hian Lal Isua thusawi anga an tarlan tak mai a nih an ring a. Amaherawh engmah chiang taka finfiah theih erawh a ni chuang lo. Mihringte hian a hun leh number chungchangte hi kan buaipui duh hle. He lai chang pawh hi chhut dik tumna a awm fo thin a; a tum zawk chu Lal Isua leiah phumin a awm dawn tih hi a ni mai. A hun rei lam hi a pawimawh ber chu a ni lova thihna hneha a thawhlehna thu hi a pawimawh ber chu a ni zawk.
Chanchin tha Luka ziakah chuan Jona chanchin a sawi hian nghapui & ni thum leh zan thum chungchang hi a sawi ve lo va. Jona chu Ninevi khuaa mite tan chhinchhiahna a nih angin Isua pawh a hunlaia mite tan chhinchhiahna a la nih ve tur thu a sawi mai a ni (Lk. 11: 29 ff). Chuvangin Lal Isua hian Jona chungchang hi a sawi ngei a ni tih chu a rinawm a. Chanchin tha ziaktu Matthaia hian Lal Isua thusawi hi a sawitu aia uar deuh hlekin a lo ziak ta pawh a ni mahna.

HLA LEH A PHUAHTU
Han thlir ilangin, Kalvari tlanga thihna (KHB-225)
He hla phuahtu hi Upa Kapzinga Tochhawng a ni a. Kum 1916 khan Khuanglian khuaah a lo piang a. Upa Kapzinga hi naupang chhia mai mai anga a awm lai pawha rualawh ti na mi tak a ni a. An khua atanga sikul hnai ber Saitual khuaah zirtirtu Selchhunga hnenah lehkha a zir thin. Tlangval uaih a nih hnuin Lower Primary a pass a ni.
Kum 1936-ah nupui a nei a, fapa pali leh fanu pathum a nei a. Maite khuaah Lower Primary zirtirtu hna a thawk a. Rambuai lai khan Tlungvel khuaah sawikhawm avangin a awm leh a. Tah hian a pension thlengin zirtirtu hna a thawk ta a ni.
Upa Kapzinga hi Kristian a nih hma pawha lungleng thei tak, hla ngaina leh zai thiam tak a ni. Pathian thu a awih tak hnu pawhin kohhran ban pawimawh tak pakhat a rawn ni nghal a. Hla hi a hlimpui em em thin. Pathian a pawl a, a thinlungah Pathianin hla thute hmangin a rawn pawl ve thin. Hla pawh a phuah tam ve hlein a fate chuan an sawi a, Kristian Hlabuah erawh hi chuan tuna kan hla han tarlan bak hi chu sengluh lo a ni mahna. Engpawh nise he hla avang hi chuan Good Friday vuakvet hi chuan kan hrechhuak fo ngei ang:
Han thlir ilangin, Kalvari tlanga thihna hmun saw;
Khawvel chhandamtu kan
Lal Isua
Lungngai leh thlaphanin
amah an bawm