CHHANDAMNA
Chhandamna thu hi Kristian thurin zinga a pawimawh ber pakhat a ni hial awm e. Heti taka thurin pawimawh hi ni mah se chhandamna kan pawm dan erawh chu a inang lo viau mai. Tun hma atang tawhin vawiin thlengin chhandamna bo theih leh theih loh chungchangah pawh mi thiamte an la inhnial reng a. Chhandam nih inhriatna chungchangah pawh tun hma deuh kha chuan kohhran mite ngaihdan a rual hlei thei chiah lo a nih kha. Chhandamna chungchanga hriat tur - chhandam ngai kan nihna te, chhandam tawh kan nihna te, chhandam mek kan nihna leh chhandam tur kan nihna hi a ni.
Bawhchhiatna avanga boral tur, chatuan hremhmun hmabak, kan felna ber pawh silhfen bawlhhlawh ang chauh a nih avangin mihringte hi chhandam ngai kan ni (Isai 64-6). Mihringte suala an lo tluk tak thu hi Tirhkoh Paula chuan chiang takin min hrilh a nih kha (Rom 5:19).
Bawhchhiatna avangin Pathian leh mihring inkarah chuan inhmelmakna a lo awm ta a. Hmangaihna Pathian chuan a mite chu chhandam a duh si a; a fapa chu leilung pian hma atang khan a mite sual man pe turin a lo ruat lawk diam tawh a ni (Isai 53 :1-12). Lal Isua thihna kraws-ah chuan chhandam kan lo ni ta (Gal 4:4-5; Rom 3:21-22).
Lal Isua thihna tawmpuitute chuan Pathian thu anga awm a, a tih tur min ruat ang angte ti tur leh tih loh tur a tihte tih loh ngam a ngai ta a. Chu chu chhandam nan ni lovin Pathian nena lengdun zelna kawng a ni. Hei hi chhandam mek kan nihna, kan awmdan hlui leh sualin min awp behna ata min chhandam mekna hi a ni.
Chhandam tur kan nihna hi hriat thiam a har deuh mai thei. Tirhkoh Paula pawh khan he tawngkam ‘keini chhandam mekte’ tih hi a hmang ve zauh a (1 Kor 1:18). Chhandamna famkim thihnain a khawih theih tawh loh tur taksa thar neia chhandamna kim kan chan hun hi ringtute hian kan la nghak mek a ni. Chu chu Paula pawhin nghakhlel takin a thlir ve a nih kha. (Rom 8:23). Tlukna avangin mihringte chu thiam loh chang kan lo ni a; chhandam ngai kan nih avangin Pathian chuan a fapa hmangin min chhandam leh a. Nitin kan sualna hrang hrang laka chhandam mek leh chhandamna famkim chang tura lei mite hi la chhandam tur kan ni.